آئیے قرآن سیکھیں
حافظ محمد سعید رضا بغدادی

عرفان القرآن کورس
درس نمبر45آیت نمبر92، 93، 94 (سورۃ البقرہ)
تجوید

مخرج (13) : ’’ث، ذ، ظ‘‘ کا ہے

نوکِ زبان اور ثنایا علیا کا سرا، یہاں سے یہ تینوں حروف ادا ہوتے ہیں۔ مثلاً : ’’اَث، اِث، اُث/ اَذْ، اِذْ، اُذْ/ اَظْ، اِظْ، اُظْ‘‘

سوال : ان حروف کا نام بتائیں؟

جواب : ان تینوں حروف کو ’’حروفِ لثویہ‘‘ کہتے ہیں۔ (لِثّہ مسوڑھوں کو کہتے ہیں)۔

مخرج (14) : ’’ز، س، ص‘‘ کا ہے

ان کا مخرج زبان کا سرا اور ثنایا سفليٰ کا کنارہ مع اتصالِ ثنایا علیا کے ہے۔ لہٰذا ان کو ادا کرتے وقت ان تینوں حروف پر سیٹی کی آواز پیدا ہوتی ہے۔

سوال : ان حروف کا نام بتائیں؟

جواب : ’’ز، س، ص‘‘ ان حروف کو ’’حروفِ صفیریہ‘‘ کہتے ہیں۔ مثلاً : ’’أَزْ، إِزْ، أُزْ، اَسْ، اِسْ، اُسْ، اَصْ، اِصْ، اُصْ‘‘

مخرج (15)۔ ’’ف‘‘ فا کا ہے

نیچے والے ہونٹ کے شکم اور ثنایا علیا کا کنارہ یہاں سے ’’ف‘‘ ادا ہوتا ہے۔ مثلاً : ’’اَفْ، اِفْ، اُ فْ‘‘

مخرج (16) ’’ب ‘م‘ و‘‘ کا ہے

یہ تینوں حروف ہونٹوں سے ادا ہوتے ہیں انہیں حروف شفویہ کہا جاتاہے۔

1. ’’ب‘‘ دونوں ہونٹوں کے ترحصوں کو ملانے سے۔ مثلاً
’’اَبْ‘ إِبْ‘ اُبْ‘‘
2. ’’م ‘‘ دونوں ہونٹوں کے خشک حصوں کو ملانے سے۔ مثلاً
’’اَم‘ْ اِمْ‘ اُمْ‘‘
3. ’’و‘‘ دونوں ہونٹوں کو گول کرنے سے۔ مثلاً
’’اَوْ‘ اِوْ‘ اُوْ‘‘

مخرج (17) ’’خیشوم‘‘ (غُنَّہ) کا ہے

خیشوم ناک کے بانسہ کو کہتے ہیں۔ یہاں سے غنہ ادا ہوتا ہے‘ نون مشدد اور میم مشدد کی آواز ناک میں لے جا کر گنگنانے کا نام غنہ ہے۔

ترجمہ

وَلَقَدْ جَآءَ کُمْ مُّوْسيٰ بِالْبَيِّنَاتِ

ثُمَّ اتَّخَذْتُمُ الْعِجْلَ مِنْ بَعْدِهِ وَأَنْتُمْ ظَالِمُوْنَO

وَاِذْ اَخَذْنَا مِيْثَاقَکُمْ وَرَفَعْنَافَوْقَکُمُ الطُّوْرَ ^ط خُذُوْا

مَآأٰتَيْنَاکُمْ بِقُوَّةٍ وَّاسْمَعُوْا^ط قَالُوْا سَمِعْنَا وَعَصَيْنَا

وَأُشْرِبُوْا فِی قُلُوْبِهِمُ الْعِجْلَ بِکُفْرِهِمْ ^ط قُلْ بِئْسَمَا

يَاْمُرُکُمْ بِهِ إِيْمَانُکُمْ إِنْ کُنْتُمْ مُؤمِنِيْنَO قُلْ إِنْ کَانَتْ

لَکُمُ الدَّارُ الأٰخِرَةُ عِنْدَاللّٰهِ خَالِصَةً مِنْ دُوْنِِ النَّاسِ

فَتَمَنَّوُا الْمَوْتَ إنْ کُنْتُمْ صَادِقِيْنَO

تفسیر

موسيٰ علیہ السلام کو عطا کی گئیں نو نشانیاں

1. عصا موسيٰ علیہ السلام
2. ید بیضاء
3. حضرت موسيٰ علیہ السلام کی لکنت کو دور کرنا۔
4. بنی اسرائیل کے لیے سمندر کو چیرنا۔
5. ٹڈی دل کی صورت میں عذاب
6. بدن کے کپڑوں میں جوؤں کا پیدا کرنا۔
7. مینڈکوں کا عذاب کہ ہر کھانے کی چیز میں مینڈک آ جاتے تھے۔
8. خون کا عذاب کہ ہر برتن میں خون آ جاتا تھا۔
9. طوفان کا آنا

(تفسير تبيان القرآن)

وَلَقَدْ جَائَ کُمْ مُوسيٰ.... الخ شریعت موسوی کی خلاف ورزی

فائدہ :

1۔ بچھڑا پرستی کی پرانی محبت یہود کے راہ حق پر چلنے میں مانع ہوئی۔

2۔ پرانے توہمات اور باطل محبتیں اور عصبیتیں راہ حق پر چلنے میں رکاوٹ بنتی ہیں اس لئے نئے کام کے لئے ذہنی تربیت بہت لازمی ہوتی ہے۔

قُلْ اِنْ کَانَتْ لَکُمُ الدَّارُ.... الخ

یہود کو موت مانگنے کا آزمائشی حکم

فائدہ : حب موت حسن آخرت کی علامات میں سے ہے۔ اولیاء اللہ ہمیشہ موت کو زندگی پر ترجیح دیتے ہیں۔ اس سے خود کشی کا جواز نہ نکالا جائے وہ حرام ہے۔

حدیث

عَنْ أَبِي هُرَيْرَةَ رضی الله عنه  أَنَّ رَسُوْلَ اﷲِ صلی الله عليه وآله وسلم قَالَ : حَقُّ الْمُسْلِمِ عَلَی الْمُسْلِمِ سِتٌّ. قِيْلَ : مَا هُنَّ؟ يَا رَسُوْلَ اﷲِ! قَالَ : إِذَا لَقِيْتَهُ فَسَلِّمْ عَلَيْهِ، وَإِذَا دَعَاکَ فَأَجِبْهُ، وَ إِذَا اسْتَنْصَحَکَ فَانْصَحْ لَهُ، وَ إِذَا عَطَسَ فَحَمِدَ اﷲَ فَسَمِّتْهُ، وَ إِذَا مَرِضَ فَعُدْهُ، وَ إِذَا مَاتَ فَاتَّبِعْهُ. رَوَاهُ مُسْلِمٌ وَالدَّارِمِيُّ.

’’حضرت ابوہریرہ رضی اللہ عنہ سے روایت ہے کہ حضور نبی اکرم صلی اللہ علیہ وآلہ وسلم نے فرمایا : ایک مسلمان کے دوسرے مسلمان پر چھ حق ہیں : عرض کیا گیا : یا رسول اﷲ! وہ کون سے حق ہیں؟ آپ صلی اللہ علیہ وآلہ وسلم نے فرمایا : جب تو مسلمان کو ملے تو اسے سلام کر اور جب وہ تجھے دعوت دے تو قبول کر، اور جب وہ تجھ سے مشورہ چاہے تو اسے اچھا مشورہ دے، اور جب وہ چھینکے اور الحمد ﷲ کہے تو تو بھی جواب میں (یرحمک اﷲ) کہہ، اور جب بیمار ہو تو اس کی تیمارداری کر، اور جب وہ فوت ہو جائے تو اس کے جنازہ کے ساتھ شامل ہو۔‘‘