سید الطاف حسین گیلانی

اے نازشِ اہلِ حرم، اے صاحبِ عِلم و قلم
تو ہی مجدّدِ ایں صدی، اے قائدِ والا حَشم

اے رہنمائے محترم، اے رہنمائے محترم

تو دین کی تنویر بھی، تو امن کی تصویر بھی
اک ہاتھ میں قرآن ہے، اک ہاتھ میں اُجلا علم

اے رہنمائے محترم، اے رہنمائے محترم

تو پیکرِ قول و عمل، انعامِ ربِّ لم یزل
تو شاہسوارِ خشک و تَر، رُکتے نہیں تیرے قدم

اے رہنمائے محترم، اے رہنمائے محترم

تُو عزم کا کوہِ گراں، تو ضبط بحرِ بے کراں
تُو صبر کا سیلِ رواں، تُو وجہِ تحدیثِ نِعَم

اے رہنمائے محترم، اے رہنمائے محترم

یہ بچے، بوڑھے، نوجوان، یہ مائیں، بہنیں، بیٹیاں
یہ اہلِ حق کا کارواں، ہے ساتھ تیرے دم بدم

اے رہنمائے محترم، اے رہنمائے محترم

ہم سب تمہارے منتظِر، اے دلرُبائے منتظَر
اے خوبرو و خوبتر، اے شمعِ تاباں در ظُلَم

اے رہنمائے محترم، اے رہنمائے محترم

تیری مدد سے اے خدا، کر کے رہیں گے برملا
نافذ نظامِ مصطفی، از لُطفِ سلطانِ امم

اے رہنمائے محترم، اے رہنمائے محترم

الطاف کی بس ہے دعا، دائم رہے ہم پر کھلا
بابِ عطائے مصطفی، ہوں دُور سب رنج و الم

اے رہنمائے محترم، اے رہنمائے محترم