حمد باری تعالیٰ و نعت رسول مقبول صلی اللہ علیہ وآلہ وسلم

حمد باری تعالی عز وجل

طاہر سلطانی

کیجئے رب کی ثناء لمحہ بہ لمحہ دل بہ دل
اور لب پر ہو دعا لمحہ بہ لمحہ دل بہ دل
نعمتیں رب نے عطا کیں بے شمار و بے مثل
شکر کرتا ہوں ادا لمحہ بہ لمحہ دل بہ دل
المدد اے رب عالم، رب عالم المدد
ہے وظیفہ یہ مرا لمحہ بہ لمحہ دل بہ دل
مالک کون و مکاں، وہ قادر روز جزا
بس اسی سے لو لگا لمحہ بہ لمحہ دل بہ دل
رحمتیں اس کی نچھاور دو جہاں پر رات دن
ہے کرم کی انتہا لمحہ بہ لمحہ دل بہ دل
دے خدا توفیق اگر مجھ کو تو طاہر عمر بھر
میں لکھوں اس کی ثناء لمحہ بہ لمحہ دل بہ دل

نعت رسول مقبول صلی اللہ علیہ وآلہ وسلم

بیکل اتساہی

ہر اک صبح منور انہیں کے نور کی ضو
ہر اک شام تجلّی کی آرزو ہیں حضور صلی اللہ علیہ وآلہ وسلم
اجل ٹھہر کہ ابھی تیرے ساتھ چلتا ہوں
مگر یہ دیکھ، ابھی میرے روبرو ہیں حضور صلی اللہ علیہ وآلہ وسلم
کوئی بھی دیکھے تو ان کی نگاہ ایماں سے
اجل کی لاج، قیامت کی آبرو ہیں حضور صلی اللہ علیہ وآلہ وسلم
کہیں سے بھی انہیں دل سے پکاریے تو سہی
مدینہ رہ کے، قریب رگ گلو ہیں حضور صلی اللہ علیہ وآلہ وسلم
ہر اک نفس ہے درود و سلام میں بیکل
خدا گواہ! یقینا چہار سو ہیں حضور صلی اللہ علیہ وآلہ وسلم