حمد باری تعالیٰ
ترے کرم کا ہو کیسے بیاں لفظوں میں!
قلم میں اتنی ہے قوت، نہ جان لفظوں میں
جو تیرے لطف و کرم کی حدوں کو چھو پائے
کہاں سے آئے گی ایسی اٹھان لفظوں میں
میں خود بھی گنگ ہوا دیکھ کر جلال ترا
میں ڈھونڈے کو چلا تھا زباں لفظوں میں
ترے کرم کا احاطہ کروں تو کیسے کروں
نہ سوچ میں ہے، نہ اتنی اڑان لفظوں میں
نہ اتنا ظرف ہے ان کا، نہ اتنی گہرائی
سماسکے گا، کہاں آسماں لفظوں میں
لکھے جو حمد تری، سوچ کر لکھے ایسے
جبیں ہو در پر ترے اور دھیان لفظوں میں
ترے ہی ذکر سے ملتی ہے تازگی دل کو
ترے ہی ذکر سے آتی ہے جان لفظوں میں
کروں میں نذرِ خدائے عظیم کیا خالد
نہ کوئی حسنِ تخیل، نہ شان لفظوں میں
(خالد شفیق)
نعت رسول مقبول صلیٰ اللہ علیہ وآلہ وسلم
کیسے ٹھہرے دل بے تاب تیری یاد آئی
لے کے جذبات کا سیلاب تری یاد آئی
کاش تو چاند کی صورت مرے دل میں اترے
صورتِ دیدہ بے خواب تری یاد آئی
جب بھی آیا ہے تری زلفِ پریشاں کا خیال
کھولتی کیف کے سو باب تری یاد آئی
کچھ تو ویرانی زنداں کا مداوا ہوگا
ڈھونڈ کر قید کے اسباب تری یاد آئی
اس نے آتے ہی مرا سازِ جنوں چھیڑ دیا
تھام کر درد کا مضراب تیری یاد آئی
پھر تڑپتا ہے ترے ہجر میں اے جانِ قرار
دل ہوا ماہی بے آب تری یاد آئی
بے سبب دل نہیں ہوتا کبھی مائل بہ نیاز
اب بجا لایا ہے آداب تری یاد آئی
قطب کا دامنِ مقصود بھی خالی نہ رہا
بن کے اگ گوہرِ نایاب تری یاد آئی
(خواجہ غلام قطب الدین فریدی)