حمد باری تعالیٰ
تو خالق ِ عظیم ہے اِیَّاکَ نَسْتَعِیْن
تو قادر و کریم ہے اِیَّاکَ نَسْتَعِیْن
ہم غرقِ معصیت ہیں مگر اے غفور تو
ہر حال میں رحیم ہے اِیَّاکَ نَسْتَعِیْن
تو مبدی و معید ہے قیّوم و ذوالجلال
سبحان ہے علیم ہے اِیَّاکَ نَسْتَعِیْن
فانی ہر ایک چیز ہے اس کائنات کی
تو باقی و قدیم ہے اِیَّاکَ نَسْتَعِیْن
فریاد رس ہے آدم و نوح و خلیل کا
تو مرجعِ کلیم ہے اِیَّاکَ نَسْتَعِیْن
تیرا جمال غنچہ و گل سے ہے ضوفشاں
تو باری و کلیم ہے اِیَّاکَ نَسْتَعِیْن
انعام جن پہ تو نے کیا ان کا راستہ
بس راہِ مستقیم ہے اِیَّاکَ نَسْتَعِیْن
شہزاد کو حضور کے صدقے میں ہو نصیب
جو جنتِ نعیم ہے اِیَّاکَ نَسْتَعِیْن
شہزاد مجددی
نعتِ رسولِ مقبول صلی اللہ علیہ وآلہ وسلم
دنیا ہے ایک دشت، تو گلزار آپ ہیں
اس تیرگی میں مطلعٔ انوار آپ ہیں
یہ بھی ہے سچ کہ آپ کی گفتار ہے جمیل
یہ بھی ہے حق کہ صاحبِ کردار آپ ہیں
ہو لاکھ آفتابِ قیامت کی دھوپ تیز
میرے لیے تو سایۂ دیوار آپ ہیں
مجھ کو کسی سے حاجتِ چارہ گری نہیں
ہر غم مجھے عزیز، کہ غمخوار آپ ہیں
ہے میرے لفظ لفظ میں گر حسن و دلکشی
اس کا یہ راز ہے، مرا معیار آپ ہیں
انسان مال و زر کے جنوں میں ہیں مبتلا
اس حشر میں ندیم کو درکار آپ ہیں
احمد ندیم قاسمی