حمد باری تعالیٰ
اک عہدِ بے مثال ہے اِیّاکَ نَعْبُدُ
تمجیدِ ذوالجلال ہے اِیّاکَ نَعْبُدُ
اِیّاک نستعین ہے مقصودِ اہلِ دل
منشورِ اہلِ حال ہے اِیّاکَ نَعْبُدُ
دیباچۂ کتابِ الہٰی ہے فاتحہ
اور مرکزی خیال ہے اِیّاکَ نَعْبُدُ
تقریب وصلِ عابد و معبود ہے نماز
کیفیتِ وصال ہے اِیّاکَ نَعْبُدُ
پوشیدہ ان حروف میں ہے روحِ بندگی
قرآن کاجمال ہے اِیّاکَ نَعْبُدُ
وردِ زبانِ بوذر و سلمان و مرتضیٰ
ذوقِ دلِ بلال ہے اِیّاکَ نَعْبُدُ
بندہ ہوا ہے فائزِ معراجِ بندگی
کیا خوب اشتغال ہے اِیّاکَ نَعْبُدُ
دل سے نکالتا ہے غمِ روزگار کو
ہاں دافعِ ملال ہے اِیّاکَ نَعْبُدُ
شہزاد کو نصیب ہو مولا وہ بندگی
جس بندگی پہ دال ہے اِیّاکَ نَعْبُدُ
(شہزاد مجددی)
نعتِ رسولِ مقبول صلی اللہ علیہ وآلہ وسلم
سلام اے آمنہ کے لال، محبوبِ سبحانی
سلام اے فخرِ موجودات، فخرِ نوعِ انسانی
سلام اے ظلِ رحمانی، سلام اے نورِ یزدانی
ترا نقشِ قدم ہے زندگی کی لوحِ پیشانی
سلام اے سرِّ وحدت، اے سراجِ بزمِ امکانی
زہے یہ عزت افزائی، زہے تشریف ارزانی
ترے آنے سے رونق آگئی گلزارِ ہستی میں
شریکِ حالِ قسمت ہوگیا پھر فضلِ ربّانی
تری صورت، تری سیرت، ترا نقشہ، ترا جلوہ
تبسم، گفتگو، بندہ نوازی، خندہ پیشانی
اگرچہ فقرُ فخری رتبہ ہے تیری قناعت کا
مگر قدموں تلے ہے فرِّ کسرائی و خاقانی
زمانہ منتظر ہے اب نئی شیرازہ بندی کا
بہت کچھ ہوچکی اجزائے ہستی کی پریشانی
زمیں کا گوشہ گوشہ نور سے معمور ہوجائے
ترے پر تو سے مل جائے ہر اک ذرّے کو تابانی
(حفیظ جالندھری)