حمد باری تعالیٰ
اللہ مرے مولا اللہ مرے مولا
تجھ کو ہی بڑائی ہے الحمد تجھے مولا
تو مالک و خالق ہے تو وارث و رازق ہے
تیری ہی عنایت سے دنیا یہ چلے مولا
رحمان بھی تو مولا سبحان بھی تو مولا
سب خوب ہیں جتنے بھی اسماء ہیں ترے مولا
سوچوں سے تو آگے ہے اِدراک سے تو بالا
کوئی تجھے کیا سمجھے کیا تجھ سے کہے مولا
تیرے ہی خزانوں سے مخلوق سبھی کھائے
کچھ بھی نہ کمی آئے رہتے ہیں بھرے مولا
تو سب پہ کرم کردے دامان تہی بھر دے
اچھے کہ بُرے ہیں ہم بندے ہیں ترے مولا
تسبیح و ثنا تری بھولے نہ زباں میری
دل یاد رکھے میرا ہر آن تجھے مولا
ہمذالیؔ بھی اب جائے پیغام اسے آئے
مکہ و مدینہ کے لُوٹے یہ مزے مولا
(انجینئر اشفاق حسین ہمذالیؔ)
آمدِ مصطفی صلی اللہ علیہ وآلہ وسلم مرحبا مرحبا
ترا نام راحتِ قلب و جاں، تری یاد کیف و سرور ہے
ترا درد روح کی روشنی، ترا ذکر نکہت و نور ہے
تو حبیبِ ربّ کریم ہے، تو قریبِ ربّ رحیم ہے
کروں حق ادا تری نعت کا، مرے فہم و فکر سے دور ہے
تو سفیرِ وسعتِ لامکاں، میں اسیرِ سرحدِ جسم و جاں
جو عیاں ہے تیری نگاہ پر وہ مری نگاہ سے دور ہے
تری گفتگو ہے کلامِ حق، تری ہر نظر ہے پیامِ حق
تو حبیبِ ربّ قدیر ہے تو رسولِؐ ربّ غفور ہے
تری بیکراں ہیں عنایتیں، تری اَن گنت ہیں نوازشیں
مری صبح میں، مری شام میں، ترے نور ہی کا ظہور ہے
مجھے رکھنا اپنی نگاہ میں، مجھے رکھنا اپنی پناہ میں
مجھے خوفِ عالمِ دوں نہیں، مجھے خوفِ یومِ نشور ہے
مری زندگی کی جو شام ہو مرے لب پہ تیرا ہی نام ہو
بڑے احترام و خلوص سے یہ دعا خدا کے حضور ہے
(طفیل ہوشیار پوریؔ)