حمدِ باری تعالیٰ
تری رحمت کے گلشن میں درخشندہ ہے مَن میرا
ترے اَذکار پر واری سدا حسنِ سخن میرا
ترے لطف و کرم کی روشنی اتری ہے دھڑکن میں
تری رحمت نے روشن کر دیا دل کا چمن میرا
تری حمد و ثنا کی کہکشاں بستی ہے سوچوں میں
تری یادوں سے روشن ہے تخیّل کا گگن میرا
تری شانِ کریمی دیکھتا ہوں زندگانی میں
تری حمد و ثنا میں جذبۂ دل ہے مگن میرا
مری سوچوں کی ہر وادی میں جلوہ ہو ترے گھر کا
تری یادوں سے تابندہ ہو ہر لحظہ چلن میرا
قلم کی نوک پر ابھریں ہمیشہ حمد کے غُنچے
تری رحمت سے مہکا ہو سخن کا پیرہن میرا
مہک تیری عبادت کی رہے انجمؔ کی فطرت میں
تری تحمید سے غافل نہ ہو مالک بدن میرا
{ڈاکٹر محمد مشرف حسین انجمؔ}
نعتِ رسول مقبول ﷺ
رحمتوں کی بھیک دے، جود و کرم کی بھیک دے
یارسول اللہؐ! الطاف و نعم کی بھیک دے
دشتِ غربت میں رہوں کب تک یونہی بے برگ وبار
میرے نخلِ جاں کو ماحولِ حرم کی بھیک دے
میں نہیں طالب جہاں میں وسعتِ افلاک کا
اپنی الفت سے غنی کر، سوزِ غم کی بھیک دے
شربتِ دیدار سے جاں پائے گی صبر و قرار
باعثِ تسکینِ جاں چشمِ کرم کی بھیک دے
دل کی خالی جھیل میں گوہر عطائوں کے اتار
کورِ چشمی کو مری نورِ شیم کی بھیک دے
جو تری مدحت کرے، آٹھوں پہر وہ دے زباں
جو تری نعتیں لکھے ایسے قلم کی بھیک دے
میں ترے در کا گدا ہوں اس لیے میں نے یہ نعت
جس محبت جس عقیدت سے رقم کی، بھیک دے
باعثِ اعزاز ہے آصفؔ کو تمغہ فقر کا
سرفرازی کے لیے خاکِ قدم کی بھیک دے
{پیر آصف بشیر چشتی}