حمد باری تعالیٰ
کیے ہیں تیری ہی رحمت پہ تکیہ ہم ترے بندے
غریب و بے نوا و بے سہارا ہم ترے بندے
ہمیں بھی حمد کی دولت سے مالا مال فرما دے
جمالِ فکر سے خالی ہیں مولا ہم ترے بندے
اگر تو ہی نہ ہم سے بے کسوں کا ہاتھ تھامے گا
پھریں گے در بدر یونہی خدایا! ہم ترے بندے
ہماری فکر کو اسلوبِ نو ایسا عطا کر دے
مزا آجائے تحمید و ثناء کا، ہم ترے بندے
بُرے ہیں، ہم بُرے ہیں، مانتے ہیں، ہم نہیں اچھے
ہمیں کردے کرم سے اپنے اچھا، ہم ترے بندے
بڑا شاطر ہے یہ ہر گام پر کرتا ہے وار اپنا
ہمیں ابلیس کے شر سے بچانا، ہم ترے بندے
ندامت سے جھکائے سر کفِ افسوس مَلتے ہیں
تو ہم پر رحم کر بارِ الہٰا، ہم ترے بندے
ہم آصفؔ ہیں ترے محبوب کی امت سے ’’اِرحمنا‘‘
کہیں دنیا میں ہوجائیں نہ رسوا، ہم ترے بندے
{پیر آصف بشیر چشتی}
نعتِ رسولِ مقبول ﷺ
مدحت سرا حضورؐ کا معبودِ کائنات
نازاں ہے اُن کے حسن پہ مسجودِ کائنات
توصیفِ مصطفیؐ سے ہیں یوں شاد جان و دل
پایا ہو جیسے جلوۂ محمودِ کائنات
تخلیقِ کائنات ہوئی جن کے نور سے
ہے معجزہ کے وہ بھی ہیں موجودِ کائنات
کعبہ بھی سرنگوں ہوا آمد پہ آپؐ کی
پایا جو اُس نے گوہرِ مشہودِ کائنات
جن کے قدم کی خاک بھی صد رشکِ آسماں
’’وہ شاہکارِ حُسن وہ مقصودِ کائنات‘‘
منظور ہے بفیضِ نبیؐ سب کی بہتری
منشورِ دینِ حق ہے جو بہبودِ کائنات
مامور اکتسابِ فیوضِ نبیؐ پہ ہے
ارشد!ؔ حدودِ دہر میں ہر جودِ کائنات
{حکیم ارشد محمود ارشد}